Потребни се нови локации, а не мерки за пад на цените на становите. Ова е ставот на дел од градежниците по изјавата на гувернерот Славевски дека со посебни механизми се планира да се делува на пазарот на недвижности за да има поевтинување на квадратот, пренесе Телма. Препорачуваат каква одлука и да се носи, претходно да бидат консултирани сите засегнати страни за да не настанат проблеми. Причината за цените ја лоцираат во тоа што нема нови локации за градба со кои би се зголемила понудата, па поради тоа во моментов висината на квадратот ја диктираат половните, а не новите станови.
Гувернерот Славевски вчера кажа дека состојбата со цените на недвижностите особено на становите е загрижувачка и најави мерки за стабилизација, но не откри за што точно станува збор.
Од градежниот сектор тврдат и дека се соочуваат со недостаток на кадар. Нема инженери, градежни работници и се останато и тоа дополнително прави проблеми.
Според, анализите на НБРМ во првиот и вториот квартал цената на становите пораснала за околу 20 отсто. Ваквата состојба трае веќе подолго време. На одредени локации во Скопје цената за квадрат достигна и до речиси 3.000 евра.