Бурна седница на Парламентот на Црна Гора, кој денеска го изгласа Протоколот за пристапување на Македонија во НАТО, наспроти жестокото спротивставување на најголемата опозициска коалиција Демократски фронт (ДФ).

За Протоколот гласаа 44 од вкупно 81 пратеник, без ниту еден против или воздржан, а пред гласањето пратениците од ДФ ја напуштија собраниската сала.

„Демократски фронт, секако, нема да го поддржи овој протокол. Малите држави и малите народи имаат права како и големите држави, а за ваквите одлуки треба да се прашаат граѓаните. Тие навистина имаа референдум, тој референдум не успеа, но на овие од НАТО баш им е гајле што мисли граѓанинот на Македонија. Ние, за жал, во регионот имаме политичари на кои им е поважен интересот на САД отколку на сопствените држави“, рече пратеникот на ДФ, Андрија Мандиќ.

Тој им забележа на колегите од владеачката Демократска партија на социјалистите (ДПС) за свечениот пречек на спикерот Талат Џафери.

„Тој е најпознат по носењето автомат и по пукањето врз македонските полицајци. Срам да ви е“, рече Мандиќ.

Бранко Радуловиќ од Демократски фронт порача дека за нив постои само една Македонија и му се извини на нејзиниот народ што Црна Гора денеска ќе ја поддржи „македонската марионетска власт“.

Пратеникот Миодраг Лекиќ, пак, нагласи дека нема да го поддржи протоколот, бидејќи, според него НАТО нема легитимитет, а на Македонија ѝ забележа дека за пристапувањето во Алијансата не спровела референдум.

SHARE

Оставете коментар