Со ДНК-анализа до вистинските потомци на античките Македонци, предлага грчки новинар

Такис Михас, грчки новинар и аналитичар, се залага правото на наследство на античките Македонци да се утврди преку анализа на ДНК на „Северногрците“ и „Славомакедонците“.

„Денес науката дава можност да се одговори на ова прашање. И навистина тоа го користат западноевропските земји за слични прашања“, вели тој и го дава примерот со населението со темна коса и кафеави очи во Холандија, за кое до неодамна се верувало дека се потомци на холандски жени силувани од шпанската војска во Фландрија во 16 век.

Во 1576 година, за казнување на локалните востанати граѓани против Шпанија, елитниот дел на шпанската армија на Фелипе Втори, кој престојувал во Фландрија, окупирал неколку градови, кои ги ограбил и запалил. Шпанците, според преовладувачкиот став, убиле и силувале стотици жители, па оттаму и луѓето со темна коса и кафеави очи.

Но, неодамнешните научни истражувања буквално ги превртуваат овие перцепции. Истражувањето не најде никакви генетски примеси од Шпанците кај потомците на градовите што биле ограбени. Од анализата на 1.337 примероци од ДНК земени од жителите на Холандија од ограбените и запалени градови од Шпанците е заклучено дека темнокосите луѓе со кафеави очи не се генетски потомци на војниците на Фелипе Втори, како што тврди колективната меморија.

„Зошто и овде не се направи нешто слично? Зошто Нова демократија не сугерира компаративна генетска анализа на ДНК на Северногрците и на соседите со онаа на античките Македонци, па да блесне во целиот свет вистината дека жителите на грчка Македонија се вистинските наследници на Александар и на Филип? Што се чека?“, прашува Михас во коментарот објавен во весникот „Ефимерида“.

SHARE

Оставете коментар