„Унгарија сега е практично единствената европска земја што може да разговара со сите клучни играчи во светската политика“, тврди министерот за надворешни работи на Унгарија додека владата во Будимпешта истовремено одржува напнати односи со Брисел и гради стратешки врски со Вашингтон, Москва, со Кина и со Западен Балкан.
Според шефот на унгарската дипломатија Петер Сијарто, не постои проруска, туку исклучиво „проунгарска“ политика, пишува унгарски портал, а пренесува Индекс.хр
Сијарто ја отфрла идејата дека е во интерес на Европа Украина да биде силна за да го брани источниот дел од континентот. „Мислам дека ова е погрешен пристап. Источниот дел од Европа не треба да го брани Украина, туку Европа. Ние сме НАТО. Најсилниот одбранбен сојуз во светот“, тврди тој.
„Украинците се борат против Русите, а ова е херојска патриотска работа, но ова не е наша војна. Никаква морална или правна обврска за Европа не произлегува од борбата на Украинците да го одбранат својот суверенитет“. Министерот тврди дека политиката на Унгарија кон Русија воопшто не ја поткопува позицијата на земјата во ЕУ и НАТО.
„Всушност, сосема спротивното. Денес, ние сме практично единствената европска земја што може да разговара со сите главни играчи во светската политика. Ова е огромна предност, а не недостаток“, рече тој, додавајќи дека многу западноевропски политичари би сакале да бидат во иста позиција, но нивното сопствено лицемерие ги спречува во тоа.
Запрашан за „проруската политика“, тој остро одговори: „Извинете, но ние немаме проруска политика. Имаме проунгарска политика. Имаме политика што е проунгарска, а дел од тоа е одржување на цивилизирани односи со Русија. Но, тоа не е важно поради Русите, туку поради нас самите.“
Тој потврди дека Унгарија, во согласност со меѓународните договори, го смета Кримскиот полуостров за украинска територија.
Сијарто верува дека реалноста на бојното поле повеќе не може да се промени и дека тоа ја одредува содржината на мировните преговори.
„За ова мора да се согласат Украинците, Русите и Американците“, рече тој, одбивајќи да ја советува Украина дали треба да се откаже од територијата.
„Што имаме ние со тоа? И врз основа на што би рекле дека се откажувате од ова и од она. Па, тоа не е наша земја, тоа не е наша работа.“
Според него, пресвртницата нема да се случи во Брисел.
„Ако зависи од Брисел, ништо нема да се промени. Сè ќе продолжи со иста брзина напред во ќорсокак. Ако има пресвртница некаде, тоа е Вашингтон, Москва или Будимпешта.“