Торбешите ќе се запишуваат во графата за етничка припадност на пописот

Антивистот за правата на Торбешите Шериф Ајрадиноски објави дека Државната пописна комисија одобрила Торбешите да можат да се запишуваат во графата предвидена за етничка припадност на престојниот попис на населението.

Ние сме реалност која не може да се занемари, вели Ајрадиноски кој е Претседател на “Румелија” – Торбешки Културно-Научен Центар.

Предходно Ајрадиноски откако на пробниот попис не му било дозволено да биде заведен како Торбеш се обратил до: “Рубин Земон, др. на етнологија, доскорешен советник на премиерот Заев и актуелен пратеник, Фијат Цаноски, председател на Партијата за Европска Иднина и неговите соработници, Алија Камбероски-актуелен пратеник и деклариран Торбеш во Собранието на Р. Македонија, поранешните пратеници Торбеши, Мевмет Џемајлоски и Рејхан Дурмиши како и до сите свесни Торбеши и пријателите на Торбешите кои можат да дадат допринос во спречувањето на ваквите манипулации со овој дискриминиран, обесправен, лојален но злоупотребуван и напатен торбешки народ”.

Ајрадиноски во новото обраќање вели дека проблемот е надминат:

Почитувани и драги Торбеши! Сакам со посебно задоволство да ве известам дека по немилите настани од 21.06. и недорарзбирањата во врска со пробниот попис и наводната не можност слободно да ја искажеме нашата торбешка етничка припадност, за која бевте информирани и за која се разви голема дискусија, револт и незадоволство. Покрај дискусиите на социјалните мрежи јас лично стапив во контакт и ги информирав речиси сите фактори, човечки и институционални. од државата и меѓународните институции и организации кои ги третираат човековите права и за кои сметам дека можат да дадат свој допринос кон овие проблеми, разговарајќи за сите меѓународни договори и конвенции како и за законот за попис на Р. Македонија. На мое пријатно изненадување, денес (22. 06) бев посетен од истите попишувачи, но во придружба на покомпетентна личност, експерт од Заводот за статистика на Р. Македонија. Се задржавме на еден поконструктивен разговор, ги надминавме недоразбирањата и сите заедно констатиравме дека тоа вчера било несреќна грешка, констатирајќи го и потенцирајќи го членот од Законот за попис кој вели дека „попишувачот е должен местото за етничка припадност да го напише онака како што ќе се изјасни попишаниот„! Во споменатив случај Торбеш! Грешката беше поправена и на мое и на нивно задоволство со дадено ветување дека така ќе биде и на официјалниот попис во април следната година. Се надевам и верувам дека тоа ќе биде една голема демократска придобивка не само за Торбешите, туку и за сите луѓе со добра волја, за целата демократска јавност па и за самата држава Р. Македонија. Во оваа прилика сакам во името на сите Торбеши и во мое лично име да изразам благодарност до сите кои, на било кој начин допринесоа овој проблем да биде решен или дадоа макар и морална подршка. Воедно ги информирам сите Торбеши дека во тек на следниот попис ќе биде формирано тело кое ќе ги следи настаните и ќе реагира на секоја неправилност или злоупотреба, а ако случајно нешто слично некому се случи од некои други неупатени или злонамерни попишувачи, веднаш да бидеме известени со цел брзо да се реагира до надлежните органи и експертите од Заводот за статистика. Со почит Ваш Шериф Ајрадиноски Претседател на Румелија Торбешки Културно-Научен Центар

SHARE