Вицепремиерот за евроинтеграции повторно на различна фрекфенција со Макрон и Тимоние

Десетина дена откако францускиот амбасадор Кеистијан Тимоние го пренесе ставот на официјален Париз дека без фер и коректни избори нема датум за преговори со контра барање се јави Бујар Османи вицепремиер за европски прашања.

Тој смета дека ако ЕУ не и додели датум за преговори во март додека се уште на власт се ДУИ и СДСМ тоа ќе значи мешање на ЕУ во изборите.

Тимоние во своето интервју за Слободен Печат на 15 февруари објави дека Мај е рокот до кој ЕУ може да стигне да додели датум и тоа само ако има резултати во реформите.

Вицепремиерот Бујар Османи во интервју за Агенција Европа без да каже што е сработено од европската агенда вели дека е важно одлуката за отпочнување на преговорите со ЕУ да биде донесена во март, како признание за напорите на Владата.

“Сега е единствен логичен момент затоа што, ако се случи во март, тоа ќе биде за време на мандатот кога се направени сите тешки компромиси” , вели Османи осврнувајќи се на договорите со Бугарија и Грција како и Законот за јазици.

Вицепремиерот оценува дека одлуката треба да биде донесена на мартовски самит на ЕУ, односно пред изборите во април и со тоа отвара дилеми дали тој е сигурен дека неговата партија ќе биде дел од идната влада.

“Да не се донесе одлука би било најголемото можно мешање во изборите, затоа што за време на овој мандат, преземавме политички ризик и ја втемеливме таа одлука врз ветувањето на ЕУ. Им рековме на нашите сограѓани, во референдумското прашање дека имаме договор со ЕУ: ако ние го исполниме нашето ветување, ЕУ ќе го исполни своето. Ако ЕУ не го стори тоа за време на овој мандат, ова ќе биде најголема интервенција во изборите и ќе има огромни последици”, предупредува вицепремиерот задолжен за европски прашања.

Од претстојната нова методологија на Европската Комисија која треба да се објави на 5 февруари, Османи очекува кредибилитет.

“Многу е важно затоа што после Самитот во октомври кредибилитетот на ЕУ е нарушен во регионот и треба да работиме на тоа да го вратиме, тоа е витално за перспективата на регионот”, вели Османи.

Тој додава дека оваа нова методологија не смее повторно да ја одложи одлуката за почеток на преговорите.

“Не е исто одлуката да се донесе во март или во јуни. Ако е во март тоа ќе биде дел од наративот кој испраќа позитивна порака до регионот дека доколку се однесувате европски ќе бидете наградени. Ако биде во јуни, тоа ќе биде само еден бирократски процес на процена на исполнување на условите”, објаснува вицепремиерот.

Запрашан за донесувањето на законот за јавно обвинителство, Османи го нарекува “непишан услов“, но смета дека доколку тој претставува клуч до отворањето на преговорите, опозицијата треба да го искористи за да биде и таа дел од европскиот успех.

SHARE