Лесна и уверлива победа на фудбалската репрезентација на Македонија над Лихтенштајн од 5:0 во Скопје за враќање на врвот од табелата во квалификациската група за Светското првенство 2026 во САД, Канада и Мексико.
Пред 6.000 гледачи на Националната арена „Тодор Проески“ серијата мајсторски потези и голови ја отвори Елиф Елмас со слалом низ гостинската одбрана крунисан со погодок во 15. минута, а ја продолжи капитенот Енис Барди со прецизен волеј во 52. минута.
Четири минути подоцна погоди Дарко Чурлинов, по него Лирим Ќамили во 82. минута, а точка на голеадата стави Лука Станковски во последната.
За Елмас ова е 14. гол во националниот тим, Барди со 19. погодок се зацврсти на третото место меѓу најдобрите стрелци во историјата на македонската селекција, Чурлинов стигна до петтиот гол за „црвено-жолтите“, Ќамили до вториот, а Станковски до својот првенец.
Македонија е прва во групата со 11 бода од пет одиграни натпревари, еден повеќе од Велс, трета со 7 бода од три меча е Белгија пред вечерашниот дуел со Казахстан, кој има 3 бода од четири средби и на дното е Лихтенштајн без бодови.
Во продолжението од квалификациите на 10 октомври избраниците на селекторот Благоја Милевски ќе му гостуваат на топ-фаворитот Белгија, а три дена подоцна ќе го пречекаат Казахстан.