Администрацијата на американскиот претседател Доналд Трамп бара од Србија и другите балкански земји да примат мигранти депортирани од САД, објавува „Блумберг“.
Барањето до балканските земји е дел од пошироката стратегија на САД за пронаоѓање странски влади кои се подготвени да примат депортирани мигранти, објавува американскиот медиум, повикувајќи се на неименувани извори, но не прецизира за кои други балкански земји станува збор.
Белата куќа, Стејт департментот и српското Министерство за надворешни работи сè уште не ги коментираа извештаите на „Блумберг“.
Минатиот месец, Врховниот суд на САД ѝ дозволи на администрацијата на Трамп да го поништи привремениот правен статус на стотици илјади мигранти од Венецуела, Куба, Хаити и Никарагва кои живеат во САД.
Властите сега бараат потенцијални дестинации за овие мигранти кои би можеле да бидат депортирани, објавува „Блумберг“.
Медиумот, исто така, наведува дека Србија е важна за семејството Трамп поради облакодерот во Белград што ќе го гради инвестициска компанија ко-основана од Џаред Кушнер, зет на американскиот претседател.