Отворено писмо до редакцијата на германскиот јавен сервис Дојче Веле (DW) на Македонски јазик од бизнисменот Васко Белески кој е на релација Швајцарија- Охрид.
Во својата реакција на начинот на кој информира Дојче Веле за односот на ЕУ кон Македонија Белески зборува за однос кој се наоѓа меѓу уцена и двојни стандарди.
Отворената реакција на Белески во целост:
Почитувани,
Во последно време вашите објави често користат иронија и алузии од типот „нови епизоди на македонскиот Труман шоу“. Но, она што за некои изгледа како „сатира“, за граѓаните на оваа држава е реалност во која се живее секој ден – реалност на постојана политичка уцена и европско лицемерие.
Македонија денес е држава што не може да почне преговори со ЕУ поради нелогичните и антидемократски барања на соседна Бугарија.
Иако на последниот попис само околу 200–300 лица ( а се тврди дека биле 2-3 илјади) се изјасниле како Бугари, токму нивното внесување во Уставот стана главен услов за отворање на преговорите.
Во исто време, во самата Бугарија живеат над 200.000 Македонци, кои не смеат да се организираат во здруженија – и покрај повеќекратните пресуди на Европскиот суд за човекови права во Стразбур.
Тоа е суштината на проблемот: Европа дозволува двојни стандарди – едни вредности за големите и влијателните, а други за малите и непослушните.
Денес Бугарија не го признава македонскиот јазик, ги спори историските личности и, парадоксално, го користи тоа како инструмент за блокада на земја што се стреми кон европска интеграција.
Премиерот Христијан Мицкоски отворено посочи дека ова не е реформски процес, туку политичка уцена без основа во европското право.
И навистина, тешко е да се зборува за „европски вредности“ кога токму тие вредности се прекршуваат во срцето на Унијата.
Од вас, како медиум со долгогодишна традиција, се очекува не иронија, туку професионално известување, аналитички пристап и почит кон вистината.
Сатирата е дозволена, но молкот пред неправдата никогаш не бил новинарство.
Со почит,
Васко Белески