Новата реконструирана зграда на гимназијата „Кирил Пејчиновиќ“ во Тетово денеска официјално беше пуштена во употреба, во присуство на премиерот Христијан Мицкоски, градоначалникот на Тетово Биљал Касами и министерката за образование и наука Весна Јанева.
Министерката Јанева истакна дека објектот е реновиран според најсовремени стандарди, со комбинирани средства од Владата на Република Македонија, локалната самоуправа и општествено одговорни компании. Таа додаде дека ова не е изолиран проект – во Тетово во моментов се реализираат вкупно 10 образовни проекти, за кои се обезбедени 255 милиони денари.
Меѓу реализираните проекти се реконструкциите на основните училишта „Рилиндија“, „Гоце Делчев“ и „Кастриот Скендербег“. Во план е и изградба на шест нови спортски сали за основните и средните училишта во Тетово и тетовско подрачје кои досега немаа соодветни спортски објекти.
Премиерот Мицкоски изрази задоволство од брзината и квалитетот на реализацијата и им се заблагодари на градоначалникот Касами, советниците и Министерството за образование.
„За само неколку месеци, со навистина силна и посветена работа, тоа што тогаш можеби делуваше невозможно, денеска е возможно, реално. Сакам на учениците и на наставниците кои ќе учат и работат во овие простории да им посакам многу знаење, успех во работата и во учењето“, рече Мицкоски.
Реконструкцијата на гимназијата „Кирил Пејчиновиќ“ е дел од пошироката програма за подобрување на условите во образовните институции во Тетово, која се спроведува во соработка меѓу централната и локалната власт.