Министерот Минчев истакна дека процесот се водел отворено и сеопфатно, со активно вклучување и на опозициските политички партии. – На лидерската средба ова прашање беше отворено како една од главните теми. Иако постоеја различни ставови, ние постапката ја водевме максимално транспарентно, со можност и опозицијата да учествува во креирањето на законското решение – рече Минчев.
Тој појасни дека нацрт-верзијата на законот била доставена до сите координатори на пратеничките групи во Собранието, со рок за доставување забелешки и сугестии, од кои дел биле прифатени. – Прифатени се забелешките на опозицијата, односно барањата на СДСМ, дополнителните министри да бидат распределени во ресорите, кои тие ги предлагаа – нагласи министерот.
Како компромисно решение прифатено е техничката влада да важи уште за следните парламентарни избори, без разлика дали тие ќе бидат редовни или вонредни, а потоа целосно да се укине. Министерот нагласи дека предлог-законот ќе биде доставен од Министерството за јавна администрација до Владата, по што ќе следи собраниска расправа.
– Овој закон се донесува со 61 пратеник и без Бадентерово мнозинство. Сметаме дека 100-те дена техничка влада сериозно ја кочат силината на реформите. „Пржинската влада“ беше воведена во 2016 година за обезбедување правични и демократски избори, а по повеќе изборни циклуси со позитивни оценки, сметаме дека го исполни својот мандат и треба да остане во минатото – заклучи Минчев.