Православните христијани денеска, 12 јули, го слават празникот Петровден, еден од најголемите празници по Велигден, посветен на Апостол Петар.
Петровден повеќе се смета за црковен празник. Постарите луѓе одат во црквата, а кој постел во Петровденскиот пост се причестува. На овој ден може и да се работи зашто е во време на најголемата жетва, а според верувањето дури и светецот (Св. Петар) тој ден земал срп и жнеел.
Светиот апостол Петар е роден во селото Витсаида на брегот на Галилејското езеро. Потекнувал од рибарско семејство и нив ги видел Исус и ги повикал, по што Петар заедно со брат му Андреј го напуштиле рибарскиот занает и му се придружиле.
Првото име му било Симон, а Исус го нарекол Петар, што значи „камен“.
Како верен Христов ученик Петар бил со својот учител во многу прилики.
Прв од учениците јасно ја изрази верата во Господ Исус, велејќи: „Ти Си Христос, Син на Живиот Бог“ (Матеј, 16, 16). Љубовта кон Господ му беше голема, а во верата се утврдуваше постапно.
Кога Го изведоа Господ на суд, Петар трипати се одрече од Него, но само еден поглед на лицето Господово го исполни со срам и покајание.
По слегувањето на Светиот Дух стана неустрашлив и снажен проповедник на Евангелието. После една негова беседа во Ерусалим се обратија околу три илјади души. Го проповедаше Евангелието ширум Палестина и Мала Азија, Илирика и Италија.
На стари денови, Петар дошол во Рим кога таму владеел Нерон, голем безбожник и тиранин, противник на христијанството, а христијаните ги фрлал во арените со лавови.
Тој го осудил на смрт апостол Петар, но кога сакале да го погубат со распнување Петар ги замолил да не го прават тоа зашто не е достоен да умре како својот учител Исус Христос, туку да го распнат со главата надолу.
Егзекуторите така и направиле и на 12 јули (или 29 јуни според стариот календар) во 61 год., светиот апостол Петар во големи страдања го завршил животот.
Во близината на Рим, истиот ден бил убиен од противниците на Христијанството и светиот апостол Павле.
Затоа светата Христијанска црква споменот на овие двајца апостоли го празнува во ист ден.