Државниот студентски дом „Кузман Јосифовски – Питу“ е во процес на темелна реконструкција и се очекува на почетокот на следната календарска година објектот да биде целосно обновен, модерен и енергетски ефикасен. Денес увид во градежните работи извршија претседателот на Владата, Христијан Мицкоски и министерката за образование и наука Весна Јаневска, кои посочија дека грижата за младите е во фокусот на владините политики.
„Оваа активност е дел од проектот за енергетски ефикасна обнова на 9 државни студентски домови во Македонија, за кој голема поддршка добиваме од Европската унија и Германската развојна банка. Ова е прва фаза во која покрај студентскиот дом „Кузман Јосифовски – Питу“, опфатен е и студентскиот дом „Стив Наумов“, рече Јаневска, додавајќи дека досега е обезбеден буџет од 30 милиони евра за реализација на проектот.
Следна фаза е обновата на четири студентски домови – „Никола Карев“ во Охрид, „Браќа Миладиновци“ во Штип, „Орде Чопела“ во Прилеп и „Томе Стефановски – Сениќ“ во Скопје, кои треба да ја намалат потрошувачката на енергија од 30 до 50%, а со тоа и емисијата на јаглерод диоксид. Додека во третата фаза ќе се реновираат студентските домови „Гоце Делчев“ и „Пелагонија“ во Скопје и „Кочо Рацин“ во Битола.
„Споредено со тоа како било порано, станува збор за огромна разлика во условите и навистина студентите ќе уживаат во совладувањето на материјата на факултетите. Посакувам проектот што поскоро да се заокружи и студентите да почнат да се вселуваат“, рече премиерот Мицкоски, потенцирајќи дека Владата продолжува да ги реализира проектите и реформите кои граѓаните ги очекуваат.