Голем удар за Мета: Главниот научник за вештачка интелигенција, Јан Лекун, планира да ја напушти компанијата и да го стартува сопствениот стартап.
Ова неочекувано заминување се случува во клучен момент, кога извршниот директор Марк Цукерберг спроведува радикални промени во стратегијата за вештачка интелигенција, одејќи од фокусот на истражување со отворен код кон развој на комерцијални производи, објави „Фјутуризам“, повикувајќи се на извештај од „Фајненшл тајмс“.
Одлуката на Јан Лекун да ја напушти Мета по повеќе од една деценија претставува значителен потрес за компанијата. 65-годишниот добитник на наградата Тјуринг се смета за еден од трите „куми“ на модерната вештачка интелигенција, благодарение на неговата пионерска работа во невронските мрежи – технологија што стои во основата на денешните големи јазични модели (LLM). Неговото присуство додаде кредибилитет на често контроверзните иницијативи на Мета во областа на вештачката интелигенција.
Заминувањето на Лекун се поклопува со стратешката трансформација на Мета. Дотогаш, компанијата се фокусираше на фундаментално истражување и модели со отворен код, но сега сите ресурси се насочени кон создавање на комерцијално конкурентни производи со вештачка интелигенција, со цел да ги достигне ривалите како Google и OpenAI.
Сам Лекун е познат како скептик кон актуелната генерација на големи јазични модели. Тој смета дека оваа архитектура не може да постигне когниција на ниво на човечкиот ум, односно општа вештачка интелигенција (AGI). На програмерите им советува да се насочат кон „системи со вештачка интелигенција од следната генерација што ги надминуваат ограничувањата на LLM“, што го издвојува од индустријата која ветува дека AGI е на прагот.
Овие визионерски разлики очигледно станаа непремостливи. Мета вложи над 14 милијарди долари во стартапот за обработка на податоци со вештачка интелигенција Scale AI минатото лето и го постави тогашниот извршен директор Александар Ванг на чело на новите „Superintelligence Labs“. Овој оддел, одделен од истражувачкиот тим FAIR на Лекун, има за задача да развие „суперинтелигентна“ вештачка интелигенција базирана на LLM технологија.
Лекун, напротив, се залага за „светски“ модели што го разбираат тродимензионалниот свет преку учење од физички податоци, а не само од текст. Тој тврди дека вистинскиот напредок би можел да потрае децении, додека Цукерберг е ориентиран кон брза доминација на пазарот. На крајот, Лекун се соочи со ситуација да му поднесува извештаи на 28-годишниот Ванг, што укажува на променетите приоритети во компанијата.
Смената во фокусот дојде по критиките за најновиот модел на Мета, „Llama 4“, кој не ги исполни очекувањата во споредба со конкуренцијата. Сепак, пазарот не реагираше еуфорично ни на новата стратегија на Цукерберг.
Минатиот месец, акциите на Мета паднаа за повеќе од 11 проценти по објавата за заработката и зголемените расходи за вештачка интелигенција, кои надминаа од буџетот. По веста за заминувањето на Лекун, акциите опаднаа уште речиси 3 проценти.