Денес официјално започна нова ера во Apple. Тим Кук ја напушти позицијата извршен директор, а на чело на технолошкиот гигант доаѓа Џон Тернус, поранешниот потпретседател за хардверски инженеринг кој со години го водеше развојот на најважните уреди како што се iPhone, iPad и Mac компјутерите.
И покрај промената на врвот, Кук, кој е во Apple од 1998 година и кој ја презеде функцијата извршен директор во 2011 година откако Стив Џобс се повлече, останува во компанијата како извршен претседател на одборот на директори.
„Испраќам многу љубов до заедницата на Apple на мојот последен ден како извршен директор. Мојата титула се менува утре, но мојата љубов кон заедницата на Apple никогаш нема да се смени. Ви благодарам што сте постојан извор на инспирација“, рече Кук во својата проштална порака.
Новиот раководител, Џон Тернус, досега беше потпретседател за хардверски инженеринг. Со години водеше тимови одговорни за развој на уреди како iPhone, iPad, Mac, Apple Watch, AirPods и Apple Vision Pro, а е заслужен и за производи како AirPods, iPhone Air и MacBook Neo.
Назначувањето на лидер од хардверскиот сектор претставува природна еволуција за Apple. Стратегијата на компанијата отсекогаш била јасна – софтверот и екосистемот на услуги се создаваат првенствено за поддршка на сопствениот хардвер.
Моделите од серијата iPhone 5 беа последните на кои работеше самиот Стив Џобс, додека целата еволуција на компанијата во изминатите 15 години беше под директно водство на Тим Кук.