Неизвесноста на енергетските пазари и забрзаната инфлација во еврозоната ја ставаат Европската централна банка пред нова одлука за зголемување на каматните стапки. Истовремено се отвора прашањето колку долго ќе трае затегнувањето на монетарната политика, пишува CNBC.
Според податоците на LSEG, пазарите во целост очекуваат ЕЦБ во четврток да ја крене клучната каматна стапка за најмалку 25 базични поени.
Одлуката доаѓа во услови на раст на инфлацијата во еврозоната, која во август достигна 3,3 отсто. Цените на енергијата пораснаа за 14,3 отсто. Како нето-увозник на енергија, еврозоната е особено чувствителна на последиците од војната меѓу САД и Иран и ризиците околу транспортот низ Ормускиот Теснец, што доведе до нагло зголемување и силна нестабилност на цените на нафтата.
Паралелно растат и трошоците за задолжување на европските влади. Приносите на државните обврзници се искачија на највисоки нивоа во повеќе децении.
ЕЦБ во јуни ги зголеми каматите за првпат од 2023 година, со што клучната стапка стигна на 2,25 отсто. На следниот состанок таа остана непроменета.
Економистот Феликс Федер од Aberdeen смета дека новото зголемување е „речиси сигурно“, но клучното прашање според него е дали тоа ќе означи почеток на подолг циклус на затегнување.
Тој оценува дека високите цени на енергијата, растот на платите и зголемените инфлациски очекувања ќе ја држат ЕЦБ фокусирана на ризиците од дополнителен раст на инфлацијата.
Инвеститорите, сепак, немаат единствена слика до каде би можеле да стигнат стапките. Истражувањето на Deutsche Bank покажува дека повеќе од една третина од испитаниците очекуваат клучната стапка да достигне 2,75 отсто. Една четвртина предвидува уште само едно зголемување, додека друга четвртина очекува циклусот да заврши на ниво од 3 отсто.