Од денеска во Грција започна спроведувањето на Националната иницијатива за намалување на цените, при што Владата објави пад на цените од речиси 10 проценти на над 1.700 основни производи, објавија грчките медиуми.
Грчката национална новинска агенција АНА-МПА соопшти дека иницијативата вклучува храна, производи за домаќинството, производи за студенти, брендови на трговски синџири и месо.
Производите вклучени во иницијативата се обележани со посебни етикети, а клиентите можат да дознаат за нив на посебна електронска платформа.
Компаниите што се приклучија на иницијативата се обврзаа да ги обезбедат специфичните производи по намалена цена во период од два или четири месеци.
Грчкиот министер за развој Такис Теодорикакос објави дека цената на 1.740 производи е намалена во просек за околу 9,5 проценти во рамките на иницијативата.
Како што објави грчката економска вебстраница „Капитал“, намалувањата се резултат на преговорите меѓу Министерството за развој и добавувачите и малопродажните синџири.