Регионот има централно место во светската нафтена индустрија, не само поради големите резерви, туку и поради стратешките транспортни коридори. Особено значаен е Ормускиот теснец на излезот од Персискиот залив, низ кој поминува значителен дел од глобалниот извоз на нафта.
Тропа ли на врата нов ценовен шок?! Војната во Иран би можела да ги зголеми глобалните цени на храната, бидејќи конфликтот ги нарушува испораките на ѓубрива преку еден од најважните трговски патишта во светот. Додека енергетските пазари се фокусираа на ризиците од снабдување со нафта, стопанствениците велат дека заканите за синџирите на снабдување со ѓубрива преку Ормутскиот теснец би можеле да донесат и долгорочни економски проблеми преку инфлацијата на храната.
Цената на нафтата од ноќеска повторно се искачи над 100 долари за барел, неколку дена откако го достигнаа максимумот. Од бизнис еснафот стравуваат од можни ценовни шокови, односно ако кризата продолжи, тоа ќе влијае врз глобалните залихи на гориво.
Ако конфликтот се продлабочи, се стравува дека цената на нафтата би можела драматично да скокне и да достигне 200 долари за барел.
На 9 март 2026 година, цената на суровата нафта од типот Брент ја надмина психолошката граница од 100 долари за барел и достигна нивоа слични на оние забележани во неделите по руската инвазија врз Украина во февруари 2022 година. Ваквите шокови според експертите имаат потенцијал да се пренесат и во домашните економии преку каналот на цените на енергијата, транспортот и производствените трошоци.
Ако дојде до несакани ценовни поместувања на транспортот, тоа би се одразило и на крајната цена на храната, што и онака е скапа. Од Владата велат дека треба да има фер цени на производите, оти нема да се дозволи отстапувања и профитерство.