Македонија е пред потпишување договор со единствениот понудувач на конкурсот, откако денеска е одбиена единствената поднесена жалба, а првите 30 нови електрични автобуси се очекуваат до декември или јануари, според вицепремиерот и министер за транспорт Александар Николоски.
„Заврши и процесот на жалби, имаше една поднесена жалба и денеска беше отфрлена од Второстепената комисија за жалби по јавни набавки, такашто овојпат процесот е целосно успешно завршен. Сега влегуваме во потпишување договор, шест месеци е рокот за испорака од потпишувањето, па моето барање до понудувачот, кој сега и официјално ќе биде контрактор со државата, е првите автобуси да стигнат во декември или во јануари. Договорот е првите 30 да стигнат во рок од шест месеци, но тие се тие за кои велам да стигнат до декември/јануари, уште 60 да стигнат во рок од 12 месеци и уште 60 во ток од 18 месеци. Така што, за година и половина треба да заврши целата постапка, а првите 30 се надевам дека ќе ги имаме до декември/јануари“, изјави Николоски во „Тема на денот“ на ТВ Сител.
Сто од новите автобуси се наменети за Скопје, а останатите 50 за други градови во државата.