Поголема заштита за корисниците, построги правила за компаниите и зголемена транспарентност во работењето предвидуваат измените на Законот за финансиски лизинг, кои беа усвоени во Собранието.
Новите законски решенија се дел од реформските активности на Министерството за финансии во рамки на Реформската агенда и имаат за цел усогласување на домашната регулатива со европските стандарди.
Со измените се воведуваат појасни правила за склучување на договори за финансиски лизинг. Давателите на лизинг ќе бидат обврзани прецизно да ги наведуваат сите трошоци и надоместоци поврзани со услугата. Дополнително, се овозможува склучување на договори и во електронска форма, согласно прописите за електронски документи и идентификација.
Корисниците ќе добијат право во секое време целосно или делумно да ги отплатат преостанатите обврски без дополнителни трошоци, со што значително ќе се намалат вкупните трошоци за преостанатиот период од договорот.
„Со цел зголемување на транспарентноста и заштитата на корисниците, со измените се прецизираат задолжителните елементи што треба да ги содржи секој договор за финансиски лизинг, вклучително и сите надоместоци поврзани со лизингот“, велат од Министерството за финансии.
Новите правила предвидуваат и дека давателите на финансиски лизинг нема да можат да го користат предметот на лизинг како залог без претходна писмена согласност од корисникот, која треба да биде дадена пред нотар во посебен документ.
Со измените се зголемува и транспарентноста на компаниите преку обврска за јавно објавување на годишните финансиски извештаи заедно со мислењата на овластените ревизори. Минималниот износ на основната главнина се зголемува од 6 на 30 милиони денари, со цел поголема финансиска стабилност на лизинг-компаниите.
Измените, исто така, ги вклучуваат и препораките на MONEYVAL Комитетот при Советот на Европа во делот на спречување перење пари и финансирање тероризам.