Обвинетите Стефан Китанов, Александар Вучевиќ и Филип Таневски добија казна затвор од по 5 години, а обвинетиот Стојан Миланов доби казна затвор од 3 години и 8 месеци. На оваа првостепени пресуда тие имаат право на жалба во рок од 15 дена.
“Постапката започна пред 9 месеци и имаше постојан бек и беа почитувани сите процесни права. Доказите изведени во постапката ја зацврстија одлуката на судот. Сите странки во постапката беа коректни. Кокаин и марихуана беа пуштени во неовластена продажба. Доказите беа јавно изведени, а посебните истражни мерки покажаа како дејствувала групата. Биле мотивирани од брза и лесна заработувачка на пари“, посочи судијата Илија Трпков кој ја води оваа постапка.
Тој образложи и дека во станови во Скопје се продавала дрогата, а се пакувала на грамови. Цената била од 4.000 до 6.000 денари за грам кокаин, а парите групата ги давала на Штекли, а тој за тоа им давал награда.
Во случајот беа опфатени 16 лица, од кои седум склучија спогодба и добија затворски казни од 3 до 3,5 години, додека четворица признаа вина и постапката за нив беше раздвоена. Според обвинението, групата дејствувала од јануари 2024 до јануари 2025 година и била добро организирана, со јасно одредени улоги – од набавка до продажба на кокаин и марихуана. Според Обвинителството, првообвинетиот Раде Трајковски-Штекли е организатор и координатор, кој бил во контакт со лица од странство и домашни посредници за првична набавка на кокаин, давајќи насоки и упатства за проширување на мрежата.
Првообвинетиот Раде Трајковски-Штекли изјави дека не го разбира обвинението, а другите обвинети се изјаснија дека не се чувствуваат виновни. Одбраната на Трајковски истакна дека ќе докаже оти тој не формирал, ниту организирал криминална група и дека не постојат докази дека давал инструкции посочувајќи дека наводите на Обвинителството се засновуваат врз претпоставки.