Од АСОМ наведуваат дека дискусиите на јавната расправа, во која учествувале претставници на бизнис секторот, експерти, граѓански организации и здруженија на лица со попреченост, укажале на низа отворени прашања кои, како што велат, не можат да се надминат со поединечни измени. Претседателот на АСОМ, Васко Илијевски, истакна дека зад најавените мерки за заштита на младите се крие ризик од воспоставување државен монопол во онлајн приредувањето игри на среќа, што, според него, би го нарушило пазарниот баланс и би имало негативни економски последици. Тој предупреди дека ваквиот модел би можел да доведе до затворање на легални компании и раст на нелегалниот пазар, со што би се загрозиле и илјадници работни места.
Експертот Зоран Пухач, кој исто така учествуваше во расправата, оцени дека предложениот модел на оданочување е економски неодржлив и може да предизвика гаснење на легалниот пазар, нагласувајќи дека оданочувањето на непостоечка добивка не е во согласност со европската пракса.
Претставникот на вработените, Стефан Крстевски од здружението „Сакам да работам“, предупреди дека евентуалното усвојување на законот би можело да доведе до губење на работните места на околу 10.000 лица и да поттикне нов бран иселување.
Од Националниот совет на инвалидски организации беше истакнато дека дел од средствата од индустријата се користат за поддршка на лица со попреченост преку дневни центри, ортопедски помагала и други програми од социјален карактер.
И од Стопанската комора на Македонија беше побарано законот да се повлече, со образложение дека е потребна дополнителна анализа и поширока консултација со сите засегнати страни, имајќи ја предвид важноста на секторот за економијата и јавните приходи.
Претставниците на индустријата дополнително укажаа дека компаниите во овој сектор со години инвестираат во локалните заедници, како и во спортот, културата и други општествени области, порачувајќи дека предложените измени би имале сериозни последици врз нивното работење.
На крајот од јавната расправа, АСОМ повтори дека предложениот закон отвора повеќе прашања отколку што нуди решенија и побара негово повлекување и изработка на ново, инклузивно и сеопфатно законско решение, кое ќе биде правно одржливо, економски оправдано и општествено одговорно.