Администрацијата на претседателот на Соединетите Американски Држави, Доналд Трамп, размислува за воведување сопствена листа на „добри и лоши“ членки на НАТО, со цел да ги награди сојузниците кои ги поддржаа САД во војната со Иран и да ги санкционира оние кои не го сторија тоа, дознава денес американски „Политико“ од неименуван извор.
Планот, кој е развиен во пресрет на посетата на генералниот секретар на НАТО, Марк Ратерфорд, на Вашингтон, вклучува проценка на придонесот на земјите-членки на Алијансата и нивна класификација во категории, според дипломати и службеници запознаени со иницијативата.
Според изворот, Белата куќа разгледува опции како што се преместување на американските трупи, намалување на воените вежби или ограничување на воената соработка со „непослушните“ партнери, иако специфичните мерки сè уште не се дефинирани.
Портпаролката на Белата куќа, Ана Кели, изјави дека сојузниците не обезбедиле соодветна поддршка за време на војната во Иран, нагласувајќи дека САД „ќе го запомнат тоа“.
Не беше прецизирано кои земји ќе спаѓаат во која категорија, но беше кажано дека Полска и Романија би можеле да имаат корист, со оглед на нивните блиски односи со Вашингтон и подготвеноста да примат дополнителни американски војници.
Од друга страна, некои земји, вклучувајќи ја Шпанија, како и сојузници како што се Обединетото Кралство и Франција, одбија или одложија поддршка на американските барања за време на конфликтот со Иран.
Службениците на Пентагон нагласуваат дека соработката ќе биде приоритет со „модел сојузници“, додека некои американски пратеници предупредуваат дека казнувањето на сојузниците би можело дополнително да ја ослабне Алијансата.
Овој потег, како што пишува „Политико“, се смета за нов притисок врз сојузниците, по претходните предупредувања од Трамп, вклучувајќи ги заканите за повлекување на САД од НАТО и предлози како што е анексијата на Гренланд.
Во кој список ќе се најде Македонија? Со оглед на експресно изразената поддршка за нападите врз Иран, може да се очекува една од најмладите членки на Алијансата да биде на списокот на „добри“ сојузници на САД.
„Стоиме со нашите американски сојузници во справувањето со дестабилизирачките закани на Блискиот Исток. Соединетите Држави јасно ставија до знаење дека дипломатијата секогаш е прва опција – но одвраќањето останува од суштинско значење кога постојат веродостојни ризици.
Безбедноста, стабилноста и одговорноста одат рака под рака“, објави на Икс министерот за надворешни работи Тимчо Муцунски уште првиот ден од здружениот американско-израелски напад врз Иран.
🇲🇰🇺🇸 We stand with our American allies in confronting destabilizing threats in the Middle East.
The United States has made clear that diplomacy is always the first option – but deterrence remains essential when credible risks persist.
Security, stability, and accountability go…
— Timco Mucunski (@TimcoMucunski) February 28, 2026