Маја Мојсова да каже дали ќе повика во вториот круг од локалните избори да се гласа за Стевчо Јакимовски, кој е осуден криминалец и е на црната листа на САД, праша денеска Благица Цветановска, кандидатка за член на Советот на Општина Карпош.
– Стевчо Јакимовски е осуден од македонските судови, а од САД е ставен на црна листа. Станува збор за криминалец кој местел тендери и правел ДУП-ови по мерка на урбаната мафија. Само политичар како Стевчо Јакимовски, кој е докажан криминалец, им одговара на Филипче и на Заев и на СДСМ. Затоа Маја Мојсова ја избраа да биде статист на овие избори и да послужи само како сад за прелевање гласови во вториот круг кај нивниот вистински кандидат, Стевчо Јакимовски – рече Цветановска.
Маја Мојсова молчи и не кажува до крај дали ќе ја одигра својата улога на статист на овие избори која ѝ ја дадоа Венко Филипче и Зоран Заев, додаде таа.
– Или ќе покаже грам доблест и интегритет и ќе се спротистави на бетонизацијата на Карпош која ја планираат Филипче и Заев преку Стевчо Јакимовски. Маја Мојсова мора да каже јасно и гласно дали во вториот круг ќе повика да се гласа за Стевчо Јакимовски, а со тоа и за бетонизација на Карпош по мерка на Филипче и Заев, за сметка на граѓаните, кои ќе добијат запуштена општина – рече Цветановска.