Бугарскиот европратеник Андреј Ковачев од Брисел изрази очекување дека Македонија ќе ја намали реторијата кон Бугарија по убедливата победа на ВМРО-ДПМНЕ на локалните избори.
„Се надевам дека реториката во Република Северна Македонија ќе се намали, дека ќе ги надминеме омразата и фалсификатите што ги подметнаа тоталитарните режими, било да е тоа во Титова Југославија или во комунистичка Бугарија, откако премиерот на Северна Македонија, Христијан Мицкоски убедливо победи на изборите“, изјави европратеникот од Европската народна партија и член на Бирото на Европскиот парламент (ЕП) пред новинарите во Брисел.
Тој додаде дека ќе продолжи да инсистира на преговарачката рамка, во која експлицитно се споменува бугарската заедница, како и да се постигнат сериозни резултати во врска со билатералниот договор меѓу Бугарија и Македонија.
„Ова не е дополнителен услов. Ова е нешто што Република Северна Македонија го прифати како основа за преговорите за членство во Европската унија. Има работи во договорот од 2017 година кои се исклучително јасни. Не треба да има говор на омраза. Ова не се ниту европски, туку универзални човечки вредности. Не треба да биде опасно ако кажете дека сте Бугарин. Не треба да имате запрен кариерен развој. Вашите деца не треба да бидат навредувани во училиште, ниту да ви го уништат бизнисот“, рече Ковачев.
Тој даде пример дека меѓу Грција и Бугарија, и покрај противречностите во минатото, сега нема односи ни налик на тие меѓу Македонија и Бугарија.
Ковачев, исто така, изрази задоволство од договорот потпишан денеска за подготовка, изградба и експлоатација на прекуграничниот железнички тунел меѓу двете земји.
„Тажно е што ништо не е направено толку многу децении. Немаме железничка врска помеѓу Скопје и Софија и во поширок контекст помеѓу Јадранското и Црното Море. Ова е исклучително стратешки важно и во однос на новите реалности во светот и побрзото движење на одбранбената опрема“, рече тој.