Во својата последна колумна која ја пренесува Либертас првиот министер на независна Македонија Денко Малески признава дека на крајот на 1991 предлагал Сојуз на суверени Југословенски држави.
Ова се случило за време на Мировната конференција за Југославија, позната и како Хашка конференција, која започна на 7 септември 1991 година под претседателство на британскиот дипломат лорд Питер Карингтон.
Таа беше организирана од страна на Европската заедница (ЕЗ) со цел да се спречи војната и да се најде решение за кризата во поранешна СФР Југославија.
,,Јас, на четириесет плус, „наследникот“ на либералите, немав дилеми за тоа што е во најдобриот интерес на Македонија и, со образложение, напишав дека исходот треба да биде сојуз на суверени држави. Тоа беше на самиот почеток на Конференцијата кога Карингтон работеше само со министрите за надворешни работи, за подоцна да ги повика и претседателите. На крајот на Конференцијата која траеше половина година на масата се најде документот на Карингтон за создавање на лабава асоцијација, за сојуз на суверени држави чии претседатели и претставниците на другите политички институции би се состанувале периодично, по угледот на ЕЗ. Сите претседетели на југословенските републики, вклучувајќи го и Киро Глигоров, се разбира, го потпишаа документот на Карингтон освен српскиот претседател Слободан Милошевиќ кој одби и демонстративно стана од масата. Но, меѓународниот фактор беше веќе увидел дека нема да има договор меѓу народите, ја констатира дисолуцијата на Југославија и, на почетокот од 1992, Арбитражната комисија на Бадинтер излезе со свое правно мислење дека само Македонија и Словенија ги исполнуваат условите да бидат признаени од државите-членки на ЕЗ. За независноста на другите републики требаше да се почека до разврзувањето на сложените јазли на нивните внатрешни и меѓусебни односи”, пишува Малески во колумната.
План на Карингтон беше проект кој предвидуваше трансформација на Југославија во лабава асоцијација на суверени и независни држави.
Во рамки на оваа конференција беше формирана Арбитражна комисија предводена од Роберт Бадентер, која заклучи дека СФРЈ е во процес на дисолуција.
Конференцијата формално заврши со оставка на лорд Карингтон во август 1992 година, по што процесот се префрли на Лондонската мировна конференција под заедничко покровителство на ЕЗ и Обединетите нации.
Според прознанието на Малески на 12 месеци пред прогласување на независноста на Македонија тој се залагал за сојуз на суверени држави.