Претседателот на Движењето ЗНАМ – за Наша Македонија, Максим Димитриевски, оцени дека СДСМ продолжува со старата тактика на политички спинови, обиди за дефокус и конструкции насочени кон дискредитација на конкурентите, наместо да се соочи со сопствените внатрешни проблеми.
Во интервју за неделникот „Фокус“, Димитриевски вели дека приказните за наводно незадоволни или маргинализирани членови на ЗНАМ се дел од „старата матрица на политичкиот спин“.
„Сите овие приказни што периодично се пуштаат во јавноста се дел од обидот на СДСМ да ги рефокусира своите внатрешни проблеми кон другите партии“, истакна тој.
Тој потенцира дека ЗНАМ останува стабилен и автентичен политички субјект со јасна визија и црвени линии, кој не функционира како привезок на ничија политика.
За уставните измени
Димитриевски повтори дека ЗНАМ нема да поддржи отворање на Уставот под диктат и постојани нови условувања.
„Ако воопшто се отвора Уставот, тоа мора да биде резултат на јасен внатрешен консензус и реални, проверливи гаранции за националните и државните интереси и врз база на реципроцитет. Без тоа, секое инсистирање е само продолжување на политичка несигурност“, нагласи претседателот на ЗНАМ.
Тој додаде дека пратениците на ЗНАМ ќе одлучуваат исклучиво според националниот интерес, Уставот и програмските принципи на движењето, без калкулации и политички притисоци.
Димитриевски заклучи дека ЗНАМ останува посветено на градење стабилна држава, силни институции и политики во интерес на граѓаните.