Околу 3.200 невработени млади од Македонија аплицирале за владината мерка за поддршка со самовработување која е најпривлечна за оваа категорија. Тие можат да користат финансиска помош од 7.000 или 10.000 евра, во зависност од возраста, а за реализација се обезбедени 2,5 милјарди денари (над 40 милиони евра), беше кажано на денешната трибина во Велес каде се промовираше мерката.
Заменик министерот рече дека сака да ги охрабри, посебно младите лица до 29 години, но и сите други невработени лица, да го искористат периодот за аплицирање за една од најпопуларните и најатрактивните мерки, самовработувањето. Оваа мерка ќе трае до петок.
- „Помошта е 10.000 евра за невработени до 29 години и 7.000 евра за невработени над оваа возраст. Две млади невработени лциа со добар бизнис план можат да добијат 20 илјади евра ако се до 29 години, а над оваа возраст добиват 14 илјади евра“, кажа заменик-министерот за еконномија Марјан Ристески.
За оваа мерка можат да аплицираат 16.500 лица кои редовно се пријавуват во Агенцијата за вработување. Пријавувањето е до 20 јуни.
- „Со овој оперативен план, прилагодени се потребите на работодавачите, на невработените лица. Годинава имаме највисок буџет и најголем опфат на потенцијални кандидати“, рече Весна Пешова, заменичка-директор на Агенцијата за вработување.
За една седмица во Велес аплицирале 90-тина невработени лица. Пријавените посетуваат задолжителна обука.
Објавени се три огласи од Оперативниот план за вработување, наменети за самовработување на лица. Поддршка за самовработување на лица над 29 години, со финансиска поддршка за 610 лица до 430.500 денари (7.000 евра), поддршка за самовработување за млади лица до 29 години со финансиска поддршка за 720 лица до 615.000 денари (10.000 евра), самовработување во партнерство (регистрација како ДОО со 2 лица), со финансиска поддршка од 861.000 денари до 1.230.000 денари за 400 лица вработени во ново-основани правни субјекти, од кои 220 лица до 29 години. За сите кои ќе добијат средства, се предвидени обука за „Претприемништво и развивање на бизнис вештини – Ваучер систем за изработка на бизнис план и поддршка при регистрирање на бизнисите.
Крајниот рок за аплицирање по овие јавни повици е до 20 јуни 2025 година.