Македонија

Државниот завод за ревизија откри ранливости во ИТ-системот на Агенцијата за вработување

Преземените мерки и веќе доставените информации од директорот се во фокусот на понатамошното следење.

Државниот завод за ревизија (ДЗР) утврди сериозни слабости и недостатоци во имплементацијата на безбедносните мерки и контроли во информатичкиот систем на Агенцијата за вработување, со што директно се загрозува нивото на заштита на податоците и критичните ИТ-ресурси.

Ревизијата на успешност, која го опфати периодот од 2021 до 2024 година, покажа дека Агенцијата се соочува со акутен недостиг од човечки и технички капацитети, сериозни слабости во управувањето со информациската безбедност, како и со недоволно развиени механизми за заштита и континуитет во работењето.

Како еден од најкритичните проблеми е посочена кадровската потфрленост во централниот Сектор за информатика. Од предвидените седум работни позиции, активни се само две, што претставува пополнетост од едвај 28,57 проценти. Дополнително, во изминатите три години воопшто не биле реализирани обуки за ИТ-кадарот, ниту пак постои документирана програма за трајно унапредување на нивните знаења и вештини.

Ревизорите предупредуваат и на несоодветно ниво на инвестирање во одржувањето на системите. И покрај тоа што во периодот од 2020 до 2025 година биле склучени и реализирани договори за јавни набавки поврзани со ИТ-инфраструктурата, сигурносните системи и комуникациските услуги во вкупна вредност од 171,2 милиони денари (околу 2,78 милиони евра), системот во дел од периодот функционирал во законски ризични услови.

Според наодите, особено загрижува податокот што системот во период од цели 293 дена (односно 15,7 отсто од анализираниот период) воопшто не бил покриен со договор за превентивно и адаптивно одржување.

Покрај тоа, утврдени се пропусти во управувањето со личните податоци, корисничките пристапи и мрежната безбедност. Во делот на личните податоци, нагласена е потребата од итно подобрување на механизмите за следење и контрола на пристапот, како и на постапките за безбедно чување, архивирање и бришење согласно законските рокови. Исто така, ревизорите констатирале неопходност од зајакнување на резервното копирање (бекап) и обновувањето на податоците, како и редовно тестирање на плановите за континуитет на работењето со цел минимализирање на ризиците од непланирани прекини.

Од ДЗР посочуваат и на потребата од подоцнежни инвестиции во физичката заштита на ИТ-инфраструктурата, со цел да се обезбедат сигурни услови за непречено функционирање на целата опрема.

За надминување на овие состојби, ревизорите дадоа конкретни препораки за зајакнување на кадровските и техничките капацитети, ревидирање на безбедносните контроли и воспоставување строги процедури за обновување на податоците. Нивната целосна реализација треба да овозможи поефективно управување со ИТ-ризиците и повисоко ниво на заштита и стабилност на системот.

Во меѓувреме, на 13 ноември 2026 година, директорот на Агенцијата за вработување доставил информации за преземените мерки по конечниот ревизорски извештај. Известувањето е заведено под број 13–1044/7 од 5 ноември 2026 година и е приложено кон соопштението на Државниот завод за ревизија.

Најнови вести од: Македонија

Панел-дискусии во Собранието на Република Македонија

Поздравни обраќања ќе имаат претседателката на Република Македонија, проф. д-р Гордана Сиљановска-Давкова, претседателот на Собранието, Африм Гаши, директорот на Државниот архив на Република Македонија, м-р Димитар Богески и директорот на ЈНУ Институт за национална историја, проф. д-р Митко Панов.

Николоски од Виена: Реализираме инфраструктурни проекти вредни до 6 милијарди евра

Николоски нагласи и дека на Македонија ѝ се потребни меѓународни пријатели и силни партнерства, додавајќи дека преку ваквите форуми се создаваат можности за нови форми на институционална соработка со европските партнери.

To top