Основното јавно обвинителство за гонење организиран криминал и корупција поднесе обвинителен акт против Фехми Стафа за кривично дело „Примање награда за противзаконито влијание“.
Стафа, поранешен државен правобранител, е обвинет дека во периодот од октомври до 13 декември 2025 година примил 50.000 евра.
Овие средства биле наменети за посредување и искористување на неговото влијание за интервенција кај судија во Апелациониот суд Скопје, со цел да се изврши службено дејствие што не смеело да се изврши преку давање поткуп.
Обвинителниот акт е поднесен до Основниот кривичен суд Скопје, а со него е доставен и предлог за продолжување на мерката притвор поради неизменети околности.
Стафа беше уапсен на 13 декември минатата година, а притоа биле пронајдени и одземени парите.
Лицето за кое Стафа наводно требало да издејствува укинување на мерката притвор е Љупчо Пецов, осомничен во случајот „Синџир“.