Градоначалникот на Скопје, Орце Ѓорѓиевски, откри дека вкупниот долг на јавните претпријатија на градот надминува 300 милиони евра – значително повеќе од првично очекуваните 200 милиони. Оваа состојба, според него, бара „посериозен ангажман“, но претставува и „дополнителен предизвик и мотив“ за изградба на модерна метропола со која сите ќе се гордееме.
„Ќе треба посериозен ангажман, но тоа е дополнителен предизвик и мотив да изградиме метропола со која сите ќе се гордееме“, изјави Ѓорѓиевски за ТВ Сител, нагласувајќи дека состојбата не го плаши. Со добар тим и поддршка од Владата, градот ќе ја надмине кризата, вети тој.
Градоначалникот најави сеопфатни кадровски измени во сите јавни претпријатија (ЈП), вклучително менаџерски тимови, директори на ЈП, установи од културата и средни училишта. Овие промени, според него, се природни за секој лидер што сака да работи со доверба.
„Природно е секој човек да си донесе тим со кој сака да работи. Кадровските измени ќе бидат соопштени во следните денови“, рече Ѓорѓиевски.
Тој соопшти дека бројот на отпуштени поради недоаѓање на работа пораснал од 370 на речиси 500 лица, што предизвикува загуба од 5 милиони евра годишно – сума доволна за изградба на Лунапарк. Оваа пракса, вели тој, траела со месеци, па и години, а сега нема толеранција.
„За тоа се знаело и порано, но изгледа немало храброст да се преземат чекори. Нема да имам толеранција кон таквите работи“, нагласи градоначалникот.
Ѓорѓиевски објасни дека се разгледува можност не само за отпуштање, туку и за враќање на средствата и одговорност на раководителите и директорите што го дозволувале. Најмногу случаи имало во ЈП Паркови и зеленило, ЈП Комунална хигиена, Дрисла, Водовод и канализација и други ЈП.
„Не се работи за три дена, туку за месеци, па дури и години, луѓе на платен список без да доаѓаат на работа“, додаде тој.
Овие мерки се дел од пошироката реформа за финансиска стабилност и ефикасност, со цел Скопје да стане чист, зелен и просперитетен град.