Градоначалникот на Град Скопје, Орце Ѓорѓиевски, денеска се обрати на Националната конференција „Безбедност на сообраќајот во локалната самоуправа“, во организација на Републичкиот совет за безбедност на сообраќајот на патиштата (РСБСП). Во фокусот на собирот беа клучните предизвици, размената на добри практики и потребата од засилена меѓуинституционална соработка за побезбедни улици и патишта низ целата земја.
Во своето излагање, Ѓорѓиевски подвлече дека безбедноста во сообраќајот не е само техничко, туку и општествено прашање кое бара промена на навиките и свеста на сите учесници.
„Скопје е срцето на државата – економски, културен и социјален центар со динамично секојдневие и огромен сообраќаен предизвик. Секој возач, велосипедист и пешак носи дел од одговорноста. Тоа е задача што нè обврзува сите – од семејствата и училиштата, преку институциите, до медиумите.
Нашата метропола е најголемиот сообраќаен јазол во земјата. За да функционира оваа сложена мрежа, потребни се системски, професионални и координирани решенија. ЈП „Улици и патишта“, ЈСП Скопје, сообраќајната полиција, факултетите, невладиниот сектор и сите останати чинители мора да работат како една целина.
Безбедноста не се сведува само на сема семафори и пешачки премини – таа е цел систем кој ги менува навиките и однесувањето. Брзото возење, непочитувањето на правилата и игнорирањето на пешачките премини мора да станат исклучок, а не правило.
Огромен придонес ќе даде системот „Safe City“, кој веќе пробно функционира преку опомени, а од Нова година ќе почне и со казнување на несовесните возачи. Со ова решение очекуваме директно намалување на прекршоците и создавање култура на одговорно возење.
Во насока на растеретување на сообраќајниот метеж и зголемување на безбедноста, Град Скопје веќе работи на низа капитални проекти: подземната сообраќајница и кружниот тек кај Лимак, двата кружни тека кај „Тобако 2“, новото решение во Бутел кон Радишани и Чучер Сандево, модерниот кружен тек во центарот на Ѓорче Петров и новата клучка на источниот влез кај Хиподром.
Ова се само дел од визијата „Нула несреќи“ со која до 2030 година ќе реконструираме и унапредиме 50 опасни крстосници и улици по највисоки европски стандарди. Целта е Скопје да стане побезбеден град од просекот на главните градови на Западен Балкан – град каде ризикот од смрт или тешки повреди е минимизиран, а улиците се сигурни за секого.
Скопје и скопјани заслужуваат современ, предвидлив и безбеден сообраќај, каде мобилноста е ефикасна, а инфраструктурата е создадена за возачи, велосипедисти и пешаци подеднакво. Ние сме тука да го оствариме тоа со систематски, координирани и одговорни решенија“, порача градоначалникот Ѓорѓиевски.