Синоќа припадници на Одделот за сузбивање на организиран криминал при БЈБ – МВР спроведоа голема акција во Скопје. Приведени се неколку лица, а извршени се претреси на повеќе локации во рамки на истрага за сериозен финансиски криминал, дознава Експрес.
Според првичните информации, еден од главните осомничени се обидел да ја напушти државата. Истражните органи веднаш презеле мерки и ја реализирале акцијата.
Се работи за сомневања дека преку лажни извештаи и уплатници при наплата на надоместоци за регистрација на возила биле прикривани и пренасочувани парични средства.
Во случајот се опфатени и правни лица, а неофицијално дел од осомничените се вработени и во државни претпријатија.
Проценетата штета изнесува околу 2 милиони евра.
Акцијата продолжува, а од МВР најавуваат дека денеска ќе објават повеќе детали.