Министерот за здравство Сашо Клековски, заедно со градоначалникот на општина Тетово Билал Касами, директорот на тетовската болница, Ерзен Елези, и директорот на Фондот за здравствено осигурување Златко Перински, денес ја посетија тетовската болница.
За време на посетата беше презентиран концептот за целосна реконструкција, проширување и опремување на болницата. Проценетата вредност на планираната инвестиција е околу 4,56 милијарди денари, или приближно 74 милиони евра, додека конечниот модел на финансирање ќе се утврди по завршувањето на потребните анализи и процедури.
Проектот предвидува реконструкција и модернизација на Хируршкиот блок и Блокот за внатрешни болести; изградба на нов павилјон за повеќе медицински дејности; посебен објект за гинекологија, акушерство и неонатологија; снабдување со современа медицинска опрема и информатичко-технолошки системи; отстранување на амортизираните објекти и целосно реновирање на болничкиот комплекс.
„Ова е инвестиција во достоинството и безбедноста на пациентите, како и во подобри услови за здравствените работници. Ова е најважниот проект за граѓаните на Полог.
Градоначалникот на Тетово Билал Касами рече дека капиталните проекти на Владата не запираат, без оглед на тоа кој е министер.
„Ова докажува дека капиталните проекти на оваа влада не зависат од тоа кој е министер. Сега, со новиот министер, заедно со претставници на Светската банка, излеговме на терен и од денес започнува постапката за еден поважен проект за западниот дел од Македонија. Цврсто веруваме дека овој проект ќе биде во служба на граѓаните од овој дел од Македонија што е можно поскоро“, рече Касами.