Каде во моментов е плодна почва за градење станови, Охрид или Скопје?!

Охридскиот регион станува се поинтересен за инвеститорите во станови. Трендот започна пред две години и сѐ уште трае. Последните податоци на Државниот завод за статистика за издадени одобренија за градба покажуваат дека овој регион е втор по бројот на станови кои се градат или ќе се градат.

Според официјалните статистички податоци само во април инвеститорите од овој регион добиле одобренија за изградба на 232 стана.

Во Скопскиот регион кој и натаму е најпривлечен за инвеститорите во станови добиле одобренија за градење на  266 станови, додека, пак, како трет регион каде што се  се интензивира станоградбата изби Полошкиот. Таму инвеститорите во април добиле одобренија за изградба на 125 станови.

Во април се доделени одобренија за изградба на вкупно 729 станови со вкупна корисна површина од  60 833 м2. Најголем број од становите  292 се двособни и трисобни (228).

Според статистика, во април се издадени вкупно 357 одобренија за  градење што е за 38,9 % во однос на истиот период од претходната година. Од нив 177 (49,6 %) од одобренијата се наменети за објекти од високоградба, 61 (17.1 %) за објекти од нискоградба и 119 (33.3 %) за објекти за реконструкција.

Од вкупно 357 објекти, на 154 (43.1 %) како инвеститори се јавуваат физички лица, а на 203 (56.9%) објекти инвеститори се деловни субјекти.

Охридскиот е втор и по бројот на издадени одобренија за градба (74). Скопје е на прво место со 89 издадени одобренија за градба, а Полшкиот регион е трет со 62 одобренија за градба издадени во април.

Расте и предвидената вредност на објектите. Таа во април изнесувала 102,7 милиони евра, што е за 10,7 % повеќе во однос на истиот месец од претходната година.

Во 2024 година деловните субјекти извршиле градежни работи во вредност од  39 827 830 илјади денари, објави Државниот завод за статистика. Во текот на  2024  година се градени вкупно  2 641 објект и завршени се вкупно 5 405 станови со вкупна површина од 348 720 м², од кои  5 255 се во индивидуална сопственост.

Во  2024 година: завршени се  5 405 станови, чија просечна корисна површина е  64.5 м² – најмногу се градело во Скопскиот Регион. Во 2024 година индивидуалните сопственици извршиле градежни работи во вредност од 14 372 406 илјади денари. Во текот на година се градени вкупно 1 978 објекти и завршени се вкупно 2 512 станови со вкупна површина од  296 537 м², од кои  152 се станови во викенд-куќи со вкупна површина од 12 879 м².

Во 2024  година:

• Завршени се 2 512 станови, а просечната корисна површина е 118.1 м²
• Најмногу се градеше во Полошкиот Регион