Како и многупати порано во слични ситуации, директорката и професорка на Институтот за општествени и хуманистички науки од Скопје, Катерина Колозова, застана во одбрана на евробирократите што го релативизираат македонскиот идентитет, како што тоа го стори еврокомесарката за проширување Марта Кос.
Словенката ги наведе манастирите, како и погачата, пинџурот, тавче-гравчето и полнетите пиперки како дел од идентитетот што никој не може да им го одземе на Македонците, а Колозова не само што ја поддржа, туку и удри по „гордите патриоти“.
„Доста кукавте горди патриоти, Французите немаат проблем сирење и вино да ги гледаат како елемент на идентитет, а Германците пиво. Не бидете така кринџ-помпезни. Инаку, во студија од 2013, изведена на 1350 испитаници, храната Е НАВЕДЕНА како дел од македонскиот идентитет – во делот на отворените прашања, самите испитанци ја сугерираат. Побарајте ја студијата за перцепција на идентитетот, објавена на три јазици, преведена на 4, и цитирана сто пати, спроведена од наши истражувачи (на ИОХН-С), издадена 2013, и пак 2014 како комбинација на квантитативно и квалитативно истражување“, ги советува Колозова на Фејсбук сите што го осудија недипломатскиот тон на еврокомесарката.
„Значи, нема ништо покомично од овие што на своите лични профили и пишуваат писма на Марта Кос. Може некогаш ќе ги прочита и ќе се потресе. ‘Нивниот момент во историјата’, а историјата абер нема нит ќе има за овој клучен момент во нивните биографии. Барем на Куќен совет комшии ќе ги пофалат, и тоа е нешто“, ги исмеа таа сите што ѝ пишаа на Кос за да ѝ укажат за лизгавиот терен по кој се движеше во Скопје.