Градоначалникот на Општина Карпош, Сотир Лукровски, денеска се врати на работа по речиси два месеца отсуство поради здравствени причини.
Лукровски преку својот профил на Фејсбук објави дека се вратил на функцијата и ја сподели фотографија со заменик-градоначалникот Неделчо Крстевски и претседателот на Советот на Општина Карпош, Христо Саракиниов.
Тој категорично ги отфрли шпекулациите дека земал лажно боледување или дека се откажал од градоначалничката функција.
„Ова враќање за мене не претставува само продолжување на професионалните обврски, туку и лична победа над здравствените предизвици. Од срце му благодарам на премиерот Христијан Мицкоски за човечноста и поддршката. Згрозен сум од начинот на кој одредени поединци и партии пробаа да дојдат до евтини политички поени на сметка на мојата состојба“, напиша Лукровски.
Тој беше на боледување од 7 мај, а во меѓувреме Општината ја водеше заменик-градоначалникот Неделчо Крстевски.
Лукровски беше избран за градоначалник на локалните избори во октомври 2025 година како кандидат на ВМРО-ДПМНЕ, победувајќи го тогашниот актуелен градоначалник Стевчо Јакимовски од ГРОМ. Во изминатиот период, тој ретко комуницираше со медиумите.