Пратеникот на ВМРО-ДПМНЕ обвинува и за координирани напади околу темата за државјанства и отвора прашања за „златни визи“. „Од авион се гледа синхронизираноста на темата за државјанствата меѓу структури од Бугарија… за разлика од патриотизмот и непопустливоста на ВМРО“, изјави Лефков, додавајќи дека СДСМ, според него, води „поданичка политика“. Тој тврди дека ваквата координација произлегува од, како што рече, „бројни бизниси преку бугарски сметки на луѓе од врвот на СДС“ и оцени дека „некој како да ги има фатено за врат и тие мора да спроведуваат“.
Лефков обвини дека кога Бугарија има потреба од одредена тема во својата јавност, „СДС истиот ден изутрина на прес ја сервира таа услуга“, оценувајќи дека процесот за државјанства е претворен во „циркус и пародија“. Во изјавата, тој отвори и прашање за таканаречените „златни визи“, алудирајќи на документи за престој во странство кај високи функционери. „Може ли сега да побараме да нема златни визи или документи за жителство какви што има првиот човек на СДС во Дубаи?“, праша Лефков, додавајќи дека ваквите документи „создаваат сомнеж дека би можеле да се употребат за бегство од државата поради коруптивни дејства“.
Според него, ваквата политика е „незрела и по диктат, а не согласно соинтересите на Македонија“. „Ова е одвратно и може да создаде дополнителни предизвици во односите, но и штети за Македонија“, изјави Лефков. Тој заклучи дека, како што рече, „нивото на апсурд“ во однесувањето на СДС остава простор за „пародични ситуации“ во државата.