Претседателката на Македонија, Гордана Сиљановска Давкова денеска на сите православни верници им упати срдечни честитки по повод големиот христијански празник Успение на Пресвета Богородица.
„Денот на Успението на Пресвета Богородица е потсетник за вознесението нејзино со дух и тело и нејзиното застапништвото пред Божјиот престол, за нејзината духовна сила, пожртвуваност, истрајност, доследност, за нејзината исконска мајчинска љубов.
Како Мајка Божја и закрилница, таа е вгнездена и ги вдахновува срцата на сите христијански верници.
Во време обременето со искушенија и премрежија, верувам дека ликот на Мајката Божја нѐ инспирира и храбри сите нас да истраеме на патот на доброто, градењето на заедништвото, грижата и солидарноста во заедницата, чувајќи и негувајќи го мирот во неа.
Посакувам на овој светол христијански празник, храмовите на Македонската православна црква, како во татковината, така и во дијаспората, да бидат исполнети со верници сплотени во христијанската љубов под закрилата на Пресвета Богородица.
За многу години нека е големиот празник, Успение на Пресвета Богородица“, напиша Сиљановска Давкова во објавата на социјалните мрежи.