Наставникот по ликовно образование Стефан Поповски од Битола целата учебна година редовно одел на работа во подрачното училиште во Горно Оризари при ООУ „Тодор Ангелевски“ Битола.
Тој тврди дска воопшто не знаел дека уште во јануари 2025 година му бил даден отказ и дека не е на платен список.
Поповски, кој бил ангажиран во три основни училишта за да оформи полн фонд на часови, во подрачното училиште држел по четири часа неделно, активно се вклучувал во училишните активности, праќал ученици на конкурси и натпревари, цртал мурали и добивал награди.
Сè до неодамна не знаел дека е отстранет од списокот за исплата на плата.
„Веќе два месеца си ја барам правдата, одработените пари и стажот, но добивам пораки дека ако ова стигне во јавноста, никогаш повеќе нема да работам во образование. Вчера ме избркаа од училиштето. Правдата ќе ја барам на суд“, изјави Поповски за порталот Апла.
Според неговите тврдења, решението за престанок на работен однос не го добил во 2025 година, а документот што сега му го доставуваат не е потпишан од него, нема печат и е потпишан само од бившата директорка.
Прашањето што останува е зошто училиштето го ставало во распоредот на часови и во годишната програма ако постоело решение за отказ.
Поповски најави дека случајот ќе го реши судот.