Министерството за животна средина и просторно планирање денес започна со активности за чистење на дивата депонија во Никуштак, општина Липково.
Оваа локација, означена како една од најкритичните во Националниот план за управување со отпад, создава значителни ризици за здравјето на луѓето и околината, влијаејќи не само на жителите на Липково, туку и на околните општини. Постојаните пожари и загадувањето предизвикуваат сериозна загриженост кај локалното население.
За реализација на проектот, од Буџетот за 2025 година се издвоени приближно 5 милиони денари, заедно со соодветна механизација за безбедно отстранување на отпадот. По завршувањето на подготовките, денес официјално започнаа теренските работи.
Министерот Меџити истакна дека оваа иницијатива е клучна за заштита на јавното здравје и унапредување на условите за живот во Липково и регионот. Тој потенцираше дека одложувањето повеќе не е опција и дека институциите мора да преземат брзи и конкретни мерки.
Овој проект е значаен чекор кон подобрување на животната средина и заштита на здравјето на граѓаните во Липково и поширокиот регион.