„Изградбата на автопатот Охрид-Кичево влегува во својата завршна фаза и напредува со одлична динамика. Денес гордо кажуваме дека решаваме еден по еден од наследените проблеми, најголемиот- свелечиштата и косините“, сподели утрово на социјалните мрежи премиерот Христијан Мицкоски.
Тој посочи дека првата галерија од вкупно 14-те е целосно завршена и асфалтирана, оценувајќи ја како „вистинско инженерско чудо, кое бара врвни градежни решенија“, поради, како што вели, сложениот планински терен низ кој минува трасата на автопатот.
Веќе 34 километри од автопатот се ставени во функција, а премиерот нагласи дека се постигнати највисоки стандарди за безбедност и квалитет.
„Остануваме целосно посветени на завршување на овој многу значаен капитален проект во рокот кој е предвиден. Ова не е само проект, ова е автопат кој ги поврзува граѓаните, создава нови можности за стопанството, туризмот и целокупниот економски развој на државата“, порача премиерот Мицкоски.