Владата останува цврсто на ставот дека новата Клиничка болница во Скопје треба да се гради на платото пред базенот кај арената „Борис Трајковски“, потврди премиерот Христијан Мицкоски.
„Дефинитивно остануваме на ставот дека Клиничката болница во Скопје треба да се гради на платото пред базенот „Борис Трајковски“. Тоа е земјиште кое е во приватна сопственост. Преговараме со приватниот сопственик и сакаме тука да го направиме сето тоа да може со подземен тунел да се поврзе со актуелната болница 8 Септември“, изјави Мицкоски.
Тој додаде дека локацијата е стратешка бидејќи во близина се наоѓаат Пет-центарот и поликлиниката „Букурешт“, што ќе овозможи создавање на целосен заокружен медицински комплекс.
Премиерот информираше дека со сопственикот на парцелата се преговара за трампа земја за земја и дека досега е задоволен од текот на преговорите.
Мицкоски најави дека паралелно продолжува и реализацијата на изградбата на Клиничката болница во Штип (заедно со Медицински факултет и студентски дом), како и Клиничката болница во Тетово и Здравствениот дом со проширена дејност во Кичево.
