Македонија е првата европска земја која одржува стратешки дијалог на толку високо ниво со актуелната администрација на Соединетите Американски Држави. Ова го истакна премиерот Христијан Мицкоски, коментирајќи ја тековната посета на македонската делегација во Вашингтон.
Делегацијата е предводена од министерот за надворешни работи Тимчо Муцунски, кој остварува средби со второто лице на американскиот Стејт департмент.
Премиерот Мицкоски истакна дека на маса се исклучително важни теми за иднината на државата.
„Темите кои ќе бидат опфатени се дигиталната трансформација, вештачката интелигенција, билатералната соработка, енергетиката, како и инфраструктурата во која силно инвестираме. Посебен фокус е ставен и на соработката во одбранбената индустрија, каде очекуваме голем напредок“, рече Мицкоски.
Една од најзначајните вести од овој стратешки дијалог е промоцијата на голема американска инвестиција во рударскиот сектор во Македонија. Станува збор за експлоатација на реткиот минерал антимон во кривопаланечкото село Луке.
Според премиерот, теренските истражувања се блиску до крај и наскоро се очекува почеток на ископувањата. Економскиот бенефит за државата се очекува да биде значителен, бидејќи целото производство ќе биде наменето исклучиво за американскиот пазар.
„Ќе се извезува во САД. Од инвеститорите ја добив информацијата дека топилницата би се градела во Оклахома, со што се создава еден заокружен циклус. Ова е нешто кое што е многу важно за македонската економија и за нас како граѓани“, заклучи премиерот Мицкоски.
Поврзани вести