Премиерот Христијан Мицкоски денеска остро возврати на обвинувањата од СДСМ во врска со случајот со загадената вода во Гостивар, посочувајќи дека опозициската партија намерно го премолчува градоначалникот на општината, кого самата го поддржала на локалните избори.
„Јас сум зачуден зошто првоповиканиот во случајот, а тоа е градоначалникот на општина Гостивар, никако не можете да го сретнете во соопштенијата на СДСМ. Кога велам зачуден, тоа го кажувам, иронично, бидејќи нормално е дека истата оваа политичка партија нема да го спомене него, бидејќи таа го поддржа на локалните избори во Гостивар“, рече Мицкоски.
Премиерот инсистираше да се објави официјалниот извештај и анализата според кои водата во Гостивар е безбедна за пиење. Во врска со кривичните пријави што СДСМ ги поднесе против министерот за здравство и директорите на Институтот и Центарот за јавно здравје, како и на Здравствениот и санитарен инспекторат, Мицкоски изјави дека тоа е демократско право на секоја политичка партија.
„Но, јас сум зачуден зошто, да речеме, за првоповиканиот во случајот, а тоа е градоначалникот на општина Гостивар, никако не можете да го сретнете во соопштенијата на СДСМ. Кога велам зачуден, тоа го кажувам, се разбира, иронично, бидејќи нормално е дека истата оваа политичка партија нема да го спомене него, бидејќи таа го поддржа на локалните избори во Гостивар. А сите знаат дека надлежност и право во случајот има општинското јавно комунално претпријатие. Обвинителството, заедно со Министерството за внатрешни работи, веќе обезбеди три лица и, колку што сум информиран, истрагата е сè уште во тек, не е затворена. Така што, мислам дека истрагата може да придонесе да имаме и други коишто, исто така, би биле вплеткани во овој случај, односно за коишто обвинителството или МВР во текот на истрагата ќе констатираат дека имаат некаков удел и учество во сето ова“, истакна Мицкоски одговарајќи на новинарски прашања по посетата на населеното место Идризово во општина Гази Баба.
Тој се појави зачуден и од тоа зошто истите социјалдемократи во минатото не реагирале по допрен глас за неквалитет на водата во Гостивар и во други општини, како Прилеп и Крушево, ниту поднеле кривични пријави против тогашните директори и министри.
„Зошто против нив не поднесоа? Бидејќи тие ништо не презеле, оваа Влада презема. Првиот момент кога доби таков извештај, презема. Направи една робусна акција, го прочисти системот и повторно го врати во владение на општина Гостивар и во рацете на комуналното претпријатие коешто ја дава оваа услуга. Мислам дека им е погрешна таа стратегија, но во ред, тие си знаат најдобро, јас нема да им кажувам што е добро, што е лошо“, додаде Мицкоски.