Министерот за надворешни работи и надворешна трговија на Македонија, Тимчо Муцунски, смета дека впишување Бугари во македонскиот устав не е единственото барање на Бугарија.
„Тоа што не ми дава голем оптимизам во овој момент е начинот на кој актуелната бугарска влада се поставува кон нас како држава на самиот почеток од мандатот. Тоа што е кристално јасно е дека уставните измени не се единственото барање на Бугарија. Има многу елементи кои тие ги гледаат како значаен дел од нашиот евроинтегративен процес, за кои ние сметаме дека нема потреба да се дискутира во ова време во кое живееме“, изјави Муцунски за ТВ Сител.
„Бугарија од нас како држава има очекувања кои не се поврзани единствено со уставните измени, туку се поврзани со идентитетски прашања, како јазикот, историјата и културата. Да, бугарската страна, за разлика од сите други земји-членки и сите европски институции, смета дека договорот од 2022 година е многу повеќе од само уставни измени – тоа е реалност со која се соочуваме и за која треба да најдеме решение“, додаде шефот на македонската дипломатија.
„Ако решението значи само почеток без извесност за крај, а знаејќи дека во меѓувреме Софија е многу конкретна во своите барања за национални отстапки, тогаш нема логика да тргнеме по пат кој е неизвесен, по кој цената ќе биде нови национални отстапки без никакви гаранции“, заклучи Муцунски.