Почетокот на издржувањето на едногодишната затворска казна на поранешниот градоначалник на Општина Карпош, Стевчо Јакимовски, е одложен поради негово барање поднесено од здравствени причини.
Како што информираат од Судот, Јакимовски на 12 јуни поднел барање за одложување на извршувањето на казната, повикувајќи се на својата здравствена состојба. Судот веднаш побарал дополнителни медицински информации од двете приватни здравствени установи што ги наведол во барањето.
До денеска, судот сè уште не добил одговор од здравствените институции, поради што на 26 јуни судијата испратил ургенција. Одлуката дали и за колкав период ќе биде одложено отслужувањето на казната ќе биде донесена откако судот целосно ќе ја разгледа медицинската документација.
Јакимовски е правосилно осуден на една година затвор за случајот со незаконската изградба на новата општинска зграда во Карпош. Во казната ќе му бидат пресметани и петте месеци што ги поминал во куќен притвор.