Поранешниот бугарски претседател Росен Плевнелиев го посочи унгарскиот премиер Виктор Орбан како најголема „бабарога“ за Бугарија по загубената битка со Македонија во Европскиот парламент, кадешто европратениците од неговата земја не успеаја да го протнат амандманот за „модерен“ пред „македонски јазик и идентитет“.
„Она што најмногу го посакувам е највисоката институција во нашата земја, Народното собрание, да одржи дебата. Бидејќи толку многу бугарски политичари се колнеа во Виктор Орбан, дека голем пријател на Бугарија, и гледате дека тој лично и неговите институции, финансирани од Унгарија, вклучувајќи ги и медиумите во РС Македонија, се во срцето на антибугарските дејствија и напади против Бугарија“, изјави за агенцијата БГНЕС шефот на бугарската држава од 2012 до 2017 година.
„На бугарскиот народ треба да му биде јасно кој е кој. Во пракса, ‘пријателот’ на Бугарија, Орбан, е исто толку пријател на нашата земја колку што е пријател на Бугарија српскиот претседател Александар Вучиќ“, додаде тој.
Плевнелиев, роден во градот Гоце Делчев во Пиринска Македонија, а по потекло е од селото Плевна во Егејска Македонија, од кадешто за време на Балканските војни неговите предци побарале засолниште во Бугарија, ја обвини Будимпешта дека со години активно учествувала во изградбата на антибугарски мрежи, поддржувајќи го и поранешниот македонски премиер Никола Груевски, на кого дури му доделила и азил.
„Груевски е апсолутен бугаромразец, со кого имав повеќе од еден проблем за време на мојот мандат како шеф на државата. Тој беше финансиран од Унгарија, избега во Унгарија, па работите станаа јасни“, изјави експретседателот на источниот сосед на Република Македонија.