Општинската организација на СДСМ Карпош јавно застана во одбрана на поранешниот градоначалник на општината и поранешен директор на Царинската управа, Стефан Богоев, откако тој беше приведен во акцијата на Управата за финансиска полиција и Обвинителството.
Во реакцијата од СДСМ Карпош се наведува дека станува збор за политички мотивиран притисок врз опозицијата и обид за пренасочување на вниманието од актуелните проблеми во Општина Карпош.
„Борба со опозиција не се прави на кукавички начин од страна на моќ“, велат од СДСМ Карпош од каде отфрлаат дека Богоев правел криминал.
Оттаму потсетуваат дека актуелната локална власт во Карпош се промовирала со проекти започнати во мандатот на Богоев, посочувајќи го покриениот базен во салата „Партизан“.
Во соопштението се оценува дека актуелното раководство на општината не успева да ги реализира ветувањата дадени пред граѓаните и затоа удриле на Богоев.
Од СДСМ Карпош бараат политичките противници дека политичката битка треба да се води „ферски, а не илеџиски“, додавајќи дека граѓаните на Карпош нема да дозволат да бидат потценети.
„Стефан Богоев, другар со тебе сме“, велат во јавната порака од СДСМ Карпош.
Богоев е меѓу лицата опфатени со истрагата за сомнежи за криминал поврзани со тендерска постапка во Царинската управа.
Од Обвинителството претходно потврдија дека под координација на ОЈО ГОКК се спроведува акција поради постоење основано сомнение за кривични дела од коруптивна природа, но без да откријат детали додека трае постапката објави Скопје1.