Поранешниот висок функционер на СДСМ, Андреј Петров, кој е дел од иницијативата „12:05“ за промени во партијата, смета дека тие треба да бидат направени во што пократок рок, за да се спречи понатамошниот пад на поддршката кај избирачите.
„Ако Филипче се повлече, ќе му помогне на СДСМ, бидејќи во моментов и тој се мачи, и СДСМ се мачи. Тоа ќе овозможи да се избере ново раководство – кое нема да биде октроирано, туку ќе биде директен производ и избор на членството на еден достоинствен начин. Мора да го сопреме надолниот пат и понирањето на партијата за да не ги пречекаме следните избори, кога и да бидат, од уште полоша позиција“, изјави бившиот член на Извршниот одбор на партијата во „Ноќно студио“ на 4ТВ.
„На сите анкети сега сме на 8%, 7,5%, некаде околу сто илјади гласа. Во моментот е толку“, нагласи ексградоначалникот на Општина Карпош. „Колку побрзо дојде до промена, шансите се побрзо да закрепне“.
Петров смета дека промената на раководството треба да биде проследена со пошироко обединување на опозицијата: „Потребно е ново раководство да разговара со различни политички и општествени групи и да се бара модел за создавање алтернативна политичка понуда“.